Lungchung Biathli

Lungchung Biathli

DK- LR Mawi

(08.03.10 )

Ruah ah ka theih

Lungchung biathli

In chim hmanh ning

Nang kan duh hi

Kaa ngaichih lo.

Nang he hmunkhat

Ttan tti ahcun

Thlichia tilet

Ten tti ding ah

Timh cia ka si-nain

Nang tel lo cun

Ka nunnak cu

Ral chiat nak in a khat.

Kan Dawt Peng Rih Ko

Peter Biak
Zeitluk na zuun ka tuar hi
Ka caah na sunlawi ning hi
Athuk bikmi ka thinlung in kan dawtnak hi
Na thei hnga maw?

Kum le caan hna an liam cang
A ziam lomi kan dawtnak hi
Hnahno cung ah ttial ning law
An zo lai lo hnah no hna nih

Aw.. ka hmuh tawn mi
Na mitsir dawh hna le
Na biangkisen hna
Ka vun hmuh ah khin

Ka kiang ah nara i
Na kut nem in na vun ka kingh rua ka ti
Tlingkhan dang cung ah
Duak tiah ka hlau tawn...

Zanttim arfi hna tang ah
Van ka cau i arfi hna karel than tawn
Arfi hna anttil chawn ah khin
Tawnthannak ding caah thla ka cam tawn

Mithmuh lo kar ah
Rili thlichia le tilet lak ka pal
Hawr thuk le tlangsang hna zong ka pal
Tikhur, vacek le cirh zong ka pal tak ko..

Thaizing timi hi vun chuak ti hlah seh law..
Kadawt tiah kan auh than ding mi ni
Um sual hlah seh law tiin,
Ziah hen lung sivang in ka umhnga..

Ka dawt......Ka rak in duh tuk
Kan dawt tuk
Kan duh tuk taktak
Kan dawt peng rih ko............

Valentine Zan Mang

Valentine Zan Mang

by Salai Eagle

Zanttim khua mawt,

Tlingkhan dang ah,

Merem thepthup lio ah khin,

Na aan ka neem ka theih,

Zukneng mit bang,

Na mitfang dawh rirei,

Na samthlairem he,

Panh sirsial tein kan i chawn,

Na kut nem ka vun tlaih

Ka ttang nem ah na hung phan,

Na samthlairem ka vun muai i,

Van na hung cau,

Na khabe mil in kan domh i

Ningzak nawn in na um lio

Stawberry bang na biangki ah,

Kan dawhnak kiss hna vurbang an tla,

Kan mit a caw,

Mithmuh lo in khuaza kan cuan

Rili kam ah kan lee tti,

Minmei cung ah kan zuang,

Pardawh phah mi zalam ah kan leng..

Ka lung khuari bang a tur

Lachon bang a neem mi na baan

Kan vun in muai ka tizawn ah khin..

Elaw..zaantim tintling cung ah,

Ka khup kaa tum i ka to ko,

Vawlei nitlak ram

Hawhra lak ah

Kan ngaihnak zuun inn

Khuaza za karuat

Nehbung khirh than i,

Ruabang tuai than law,

Ka lungkil dawtnak vialte

Vuikhat tal in kan chimh than hnga..

Eelaw.. February 14 zaan pei si hi..

Mitthlam an Cuang

Mitthlam an Cuang

~ Salai Eagle ~

Khuapau meithang an zaam cang lai

Chokhlei senri an par cang lai

Khupkhi hnah ro an ttil cang lai

Far kung hnah no an cawrh cang lai

Zilthlinem le mero dawh hna

Zuksuai bangin vandum cung ah

Fiakfai hram aw, arkhawng khuan le,

Khua luh lai i, ui bo thawng hna

Lungrawn ram dawh, tlangthluan hna le

Taanpawr rengh in chosang kainak

Tiva kuang le, mual, bawlrawn hna

Philh hin lo in, mithlam an cuang