Duhnak phawrh Rit

“Duhnak phawrh Rit”

Kan ton hlan cu, semmawng lung bang,
Zei um lo maw, Nunu ngaihnak.
Ton cang hnu cun, lungkil chungah,
Thutpi thiam lo, hngilhpi thiam lo,
Na muithlam lawng, ka mitthlam ah,
Zel chialmal hi, na thei hin lo.

Uar mi ngei in, dawt ve hlan cu,
A har ko maw, phur rit phawrh bang.
Duh hlah ning law, ka ti zawnah,
Sithiam tung lo, a zual chin tung.
Zei si kun hnga, duhnak sullam?
Ka ruah khawh mi, ka dawt tuk lai.

Duhmi ngeih cu, rethei ngai maw,
Zawt si tung lo, zan hngilh khawh lo,
Zan a tlai chin, mitkuh fim chin.
Ruatmi nunu, theihter zawnah,
Na lih ka ta, kan zum hrim lo,
Ti cang hnu cun, bia dong ko mu.

Chung lei thil cu, hmuh khawh si lo,
Phuang thiam si lo, theih khawh si lo.
Minung bia nih, a tlinh tung lo,
Duhnak sullam, dawtnak bia hi.
Nute caah, i zumh fawi in,
I palh fawi maw, dawtu tak tak.

I palh hin hlah, kei dawtnak hi,
Lenglei thil cu, a rawk kho na'n,
Chunglei dawtnak, hmun camcin lai.
Na ingpuan caan, na thinhun caan,
Thei thiam lai maw, daw taktu cun.
Dawtnak nih cun, tuar khawh lo mi,
In khawh lo mi, a ngeih tung lo.

Written By Smowan